ពោធិសាត់៖ គម្រោងពង្រីកសមត្ថភាពផ្គត់ផ្គង់ទឹកស្អាតខេត្តពោធិសាត់ ក្រោមហិរញ្ញប្បទានឥតសំណងជិត២២លានដុល្លាររបស់ប្រទេសជប៉ុន ត្រូវបានដំណើរការសាងសង់ហើយនៅ ព្រឹកថ្ងៃទី១៣ ធ្នូ ឆ្នាំ២០២១នេះ។

គម្រោងនេះមានការសាងសង់ស្ថានីយបូមទឹកឆៅ ដែលមានសមត្ថភាពបូមទឹកបាន ៧ ២៦០ម៉ែត្រគីបក្នុងមួយថ្ងៃ និងរោងចក្រប្រព្រឹត្តិកម្មទឹកស្អាតដែលមានសមត្ថភាពផលិតទឹកស្អាតបាន ៦ ៦០០ម៉ែត្រគីបក្នុងថ្ងៃ ក៏ដូចជាសាងសង់អាគាររដ្ឋបាល តំឡើងបំពង់មូលទឹកឆៅ ដែលមានប្រវែង ៨,៣គីឡូម៉ែត្រ និងបំពង់ចែកចាយទឹកស្អាតដែលមានប្រវែង ៧៥,៤គីឡូម៉ែត្រ។

ក្រៅពីនេះគម្រោងនឹងបង្កើតមន្ទីរពិសោធន៍គុណភាពទឹក និងផ្ដល់ជំនួយបច្ចេកទេសសម្រាប់ប្រតិបត្តិការ និងគ្រប់គ្រងបរិក្ខារដែលបានសាងសង់ និងគ្រប់គ្រងផលិតកម្មផងដែរ។

គម្រោងសាងសង់នេះគ្រោងបញ្ចប់នៅ ខែសីហា ឆ្នាំ២០២៣ ដែលរំពឹងថានឹងបង្កើនការផ្ដត់ផ្គង់ទឹកស្អាត់របស់រដ្ឋាករទឹកខេត្តពោធិ៍សាត់នឹងកើនដល់ចំនួន ១៣ ៨៦០ម៉ែត្រគុណក្នុងមួយថ្ងៃ ដែលអាចឈានដល់ការផ្គត់ផ្គង់ដល់ប្រជាជននៅទីប្រជុំជនចំនួនជាង៨៦% និងប្រជាជនក្នុងតំបន់សេវាទឹកស្អាតរដ្ឋាករទឹកខេត្តពោធិសាត់ចំនួនជិត៦៨ភាគរយនៅឆ្នាំ២០២៥។

នេះជាគម្រោងទី២ហើយដែលរដ្ឋាភិបាលជប៉ុនផ្ដល់ជូនដល់រដ្ឋាករទឹកខេត្តពោធិ៍សាត់បន្ថែមលើគម្រោងទី១ កាលពីឆ្នាំ២០១៤៕